जिन्दगीको यौटा यस्तो "गजल"

जिन्दगीको यौटा यस्तो भूलजस्तो मेरो कथा ।
नदीबीच बालुवाको पुलजस्तो मेरो कथा ।

यति सुन्दर बिहानीलाई कसले दागा धरिगयो
सधैँ मौन बसिदिने फूलजस्तो मेरो कथा ।

मेरै सामु हतियारले सुसज्जित छन् मित्रहरु
खुकुरीलाई सहिदिने तुलजस्तो मेरो कथा ।

व्यंग्य सुन्दा रमाउँदै धेरैधेरै हाँसेपछि
मुटुभरि बल्झिदिने शूलजस्तो मेरो कथा ।

धमिलो छ आजभोलि आँसु पनि धमिलो छ
सुकिजाने सँग्लो-सँग्लो मुलजस्तो मेरो कथा ।

लेखक: -चंकी श्रेष्ठ