चाडबाडमा चैं फर्क दाजु

लेखिका: अम्बिका गिरी

यसपाली त सयपत्री त्यसै ओइलाई झर्‍यो
बाटो हेरी बसेँ दाजु थाहै नपाई रात पर्‍यो

धेरै धन मिल्छ अरे परदेशमा गए भन्थ्यौ
रुवाई चेली तिहारमा तिम्रो धनले के पो गर्‍यो

सम्झाउँथ्यौ बा आमालाई धनले नै सुखी राख्छु
फर्किएनौ यत्रो साल उनीहरुको नि आशै मर्‍यो

परदेशीको सेवा गर्दे घरको हालत बिर्स्यौ क्यारे
तिमी खेल्ने खरबारीमा दुनियाँका बस्तु चर्‍यो

अघिपछि दुःख गर चाडबाडमा चैं फर्क दाजु
परदेशको तिम्रो बासले यो चेलीको खुशी हर्‍यो